اسلام آباد:سپیکر قومی اسمبلی سردار ایاز صادق کی قیادت میں پارلیمنٹرینز نے نیشنل ایمرجنسیز آپریشن سینٹر کا دورہ کیا اس موقع پر این ڈی ایم اے کی جانب سے وفد کو مون سون کی صورتحال اور ملک میں جاری امدادی کاروائیوں کے بارے تفصیلاً بریف کیا گیا۔
وفد کو نیشنل ایمرجنسیز آپریشن سینٹر کی مستند پیشگی اطلاع و اقدامات اور آفات کے تدارک پر بریفنگ دی گئی ۔چیئرمین این ڈی ایم اے لیفٹیننٹ جنرل انعام حیدر ملک نے مون سون اور سیلابی صورتحال پر تفصیلی بریفنگ دی۔
وفد کو مون سون کے دوران پیش آنے والے تمام واقعات، سیلاب، لینڈ سلائیڈنگ اور شدید بارشوں کے لیے این ڈی ایم اے کے اقدامات کے بارے میں آگاہ کیا ۔ چئیرمین این ڈی ایم اے نے کہا کہ سیلابی صورتحال سے نمٹنے کے لیے تمام ادارے مربوط انداز میں کام کر رہے ہیں۔
انہوں نے بتایا کہ این ڈی ایم اے بارشوں اور ہر قسم کے ممکنہ خطرات کے حوالے سے بر وقت الرٹ جاری کر رہا ہے۔تمام الرٹ عوام اور متعلقہ اداروں تک بروقت پہنچائے جا رہے ہیں تا کہ پیشگی اقدامات یقینی بنائے جا سکیں۔جبکہ این ای او سی تمام دریاؤں اور سیلابی صورتحال کی ہمہ وقت نگرانی کر رہا ہے۔
چئیرمین این ڈی ایم اے نے مزید بتایا کہ شمالی علاقہ جات میں گلیشئرز پگھلنے کا عمل بھی نہایت تیزی سے جاری ہے جو سیلابی صورتحال کے ساتھ ساتھ دیگر خطرات کو بھی جنم دے رہا ہے۔دریاؤں میں بہاؤ زیادہ ہونے کی وجہ سے بریچنگ سائیٹ پر بند توڑ کر سیلابی صورتحال کو کنٹرول کرنے کے اقدامات کر رہے ہیں۔سیلابی صورتحال کے پیش نظر خطرے سے دوچار علاقوں میں انخلاء کے اقدامات بھی جاری ہے۔
ان کاکہناتھاکہ ابھی تک 6لاکھ افراد کو متاثرہ علاقوں سے محفوظ مقامات پر منتقل کیا جا چکا ہے۔ وزیراعظم کی ہدایت پر این ڈی ایم اے تمام ریسکیو و ریلیف سرگرمیاں کی نگرانی کر رہا ہے ۔نیشنل ایمرجنسیز آپریشن سینٹر 24 گھنٹے کے لئے مکمل فعال ہے۔این ڈی ایم اے سول و عسکری اداروں کے ساتھ رابطے میں ہے۔
اس موقع پر پارلیمنٹرینز نے قدرتی آفات سے نمٹنے اور مربوط حکمت عملی کی تیاری میں قومی سطح پر کاوشوں کی یقین دہائی کرائی ۔وفد نے مقامی آبادیوں میں آفات کی تیاری اور آگاہی کے لیے اپنی خدمات کی پیش کش کی۔وفد نے وفاقی حکومت اور این ڈی ایم اے کی قدرتی آفات سے نمٹنے اور بچاؤ کے اقدامات کو سراہا۔
