اسلام آباد:وزیردفاع خواجہ آصف نے کہا کہ صبر کا پیمانہ لبریز ہو چکا ۔ دہشت گردوں اور ان کے سہولت کاروں کے لیے کوئی رعایت نہیں۔ پاکستان دہائیوں سے لاکھوں افغان مہاجرین کی میزبانی کررہاہے تاہم یہ لوگ ہمارا کھاتے ہیں اور ہمارے خلاف ہی دشمن کا ساتھ دیتے ہیں۔
قومی اسمبلی میں اظہار خیال کرتے ہوئے وزیردفاع خواجہ آصف نے کہا کہ دہشتگردی کے خلاف پاک فوج مسلسل قربانیاں دی رہی ہے۔ قوم ان کی مقروض ہے۔ انھوں نے واضح کیا کہ دہشتگردوں کے لیے کوئی رعایت نہیں ہے۔
خواجہ آصف نے کہا کہ افغان شہری پاکستان میں کاروبار کرتے ہیں اور پاکستان ہی کو نقصان پہنچاتے ہیں۔
ایوان میں افواج پاکستان کی دہشتگردی کے خلاف قربانیوں پر اظہار خیال کرتے ہوئے وفاقی وزیر طارق فضل چودھری، راجہ پرویز اشرف، اسد قیصر، ڈاکٹر فاروق ستار، عامر ڈوگر اور شاہد اختر نے کہا کہ سکیورٹی فورسز کے افسران اور جوان ملک کیلئے قربانیاں دے رہے ہیں۔
انہوں نے کہا کہ شہداء کے لواحقین کے جذبے کو سلام پیش کرتے ہیں۔ دہشت گردی کے خلاف جنگ میں قوم مسلح افواج کے شانہ بشانہ ہے۔ انھوں نے کہا کہ معرکہ حق میں مسلح افواج نے اپنی طاقت کا لوہا منوایا ہے۔
قومی اسمبلی اجلاس کی کارروائی کل صبح گیارہ بجے تک ملتوی ہو گئی ہے۔
