اسلام آباد:نائب وزیراعظم و وزیرِ خارجہ سینیٹر محمد اسحاق ڈار کی صدارت میں کابینہ کمیٹی برائے نجکاری (CCoP) کا اجلاس منعقد ہوا ۔
اجلاس میں سیکرٹری وزارتِ نجکاری نے پاکستان انٹرنیشنل ایئرلائنز (پی آئی اے سی ایل) کی نجکاری کے آئندہ لائحۂ عمل پر تفصیلی بریفنگ دی۔
کابینہ کمیٹی نے اے ایچ سی کی قیادت میں قائم کنسورشیم کی جانب سے پی آئی اے کے 75 فیصد شیئرز کے لیے پیش کی گئی 135 ارب روپے کی بولی کی توثیق کرتے ہوئے اس کی منظوری کے لیے کابینہ کو سفارش کرنے کا فیصلہ کیا۔
نائب وزیراعظم نے متعلقہ اداروں کو ہدایت کی کہ نجکاری کے عمل کو بروقت مکمل کرنے کے لیے فوری اقدامات کیے جائیں، اس امید اور خواہش کے ساتھ کہ اس سے پی آئی اے ایک بار پھر اپنے سنہرے دور کی طرف لوٹ سکے گی۔
اجلاس میں وزیرِ توانائی، وزیراعظم کے مشیران برائے نجکاری، صنعت و پیداوار، خصوصی معاونینِ وزیراعظم بلال کیانی، طارق باجوہ،وفاقی سیکرٹریز برائے کابینہ، نجکاری، دفاع، قانون، توانائی، نجکاری کمیشن، صنعت و پیداوار اور دیگر متعلقہ محکموں کے سینئر افسران نے شرکت کی۔
