اسلام آباد:صدر آصف علی زرداری اور وزیراعظم محمد شہباز شریف نے باجوڑ اور بلوچستان میں کامیاب کارروائیوں پر سکیورٹی فورسز کو خراج تحسین پیش کیا ہے۔
صدرِ مملکت نے ایک بیان میں باجوڑمیں سرحد پار سے دہشت گردوں کی دراندازی ناکام بنانے پر سیکیورٹی فورسز کو خراجِ تحسین کرتے ہوئے بھارت کی پشت پناہی میں سرگرم فتنہ الخوارج کے سرغنہ سمیت چار دہشت گردوں کے ہلاک کیے جانے کو قوم کے عزم و استقامت کی کامیابی قرار دیا ہے۔
انہوں نے کہا ہے کہ بہادر سیکیورٹی فورسز نے وطنِ عزیز کی سرحدوں کے دفاع میں ایک اور نمایاں کارنامہ انجام دیا ہے۔وطن کے دفاع اور امن کے قیام کے لیے جانفشانی سے برسرپیکار سیکیورٹی فورسز اور قانون نافذ کرنے والے اداروں کے جذبۂ قربانی کو خراجِ تحسین پیش کرتے ہیں۔دہشت گردی کے خلاف “عزمِ استحکام” کے تحت جاری آپریشن پاکستان کے پائیدار امن اور استحکام کی ضمانت ہے۔پوری قوم اپنی مسلح افواج کے شانہ بشانہ کھڑی ہے اور فتنہ الخوارج کے مکمل خاتمے تک جدوجہد جاری رہے گی۔
وزیراعظم محمد شہباز شریف نے بھی ضلع باجوڑ میں سکیورٹی آپریشن میں انتہائی مطلوب خارجی سرغنہ سمیت 4 خارجیوں کو جہنم واصل کرنے پر سیکیورٹی فورسز کو خراج تحسین کرتے ہوئے کہا ہے کہ سیکیورٹی فورسز نے اپنی پیشہ ورانہ مہارت کی بدولت انتہائی مطلوب خارجی کمانڈر امجد کو جہنم رسید کیا اور پاکستان کی سالمیت کے دشمنوں کے مزموم عزائم کو خاک میں ملا دیا۔
وزیراعظم نے کہا ہے کہ معصوم اور نہتے شہریوں کی جان و مال کو نقصان پہنچانے والے عناصر کو اس انداز میں شکست دیتے رہیں گے۔حکومت پاکستان ملک سے دہشتگردی کی عفریت کے مکمل خاتمے کے لیے پر عزم ہے۔
اس سے قبل صدرِ مملکت نے بلوچستان کے علاقے چلتن پہاڑ، کوئٹہ اور کیچ میں کیے گئے آپریشنز میں بھارتی سرپرستی یافتہ 18 دہشت گردوں کی ہلاکت پر سیکیورٹی فورسز کی جرات و بہادری کی تعریف کی۔ انہوں نے کہا کہ سیکیورٹی فورسز کی جانب سے علاقے کی کلیئرنس اور سینیٹائزیشن کارروائیاں دہشت گردی کے مکمل خاتمے کے عزم کی عکاس ہیں۔
وزیراعظم محمد شہباز شریف نے بھی بلوچستان میں "فتنہ ہندوستان” کے 18 دہشت گردوں کی ہلاکت پر سیکیورٹی فورسز کی کامیاب کارروائیوں کو سراہا۔ وزیراعظم نے کہا کہ دہشت گردوں کے خلاف جنگ میں قوم سیکیورٹی فورسز کے ساتھ کھڑی ہے اور ہم ملک سے ہر قسم کی دہشت گردی کا مکمل خاتمہ کرنے کے لیے پرعزم ہیں۔
