کراچی: وزیر اعظم شہباز شریف ایک روزہ دورے پر کراچی روانہ ہوگئے۔
نائب وزیر اعظم اور وزیر خارجہ محمد اسحاق ڈار، وفاقی وزراء محمد اورنگزیب، عطااللہ تارڑ، وزریر مملکت علی پرویز ملک اور کوآرڈینیٹر برائے صحت ڈاکٹر مختار بھرت بھی وزیر اعظم کے ہمراہ ہیں۔
وزیراعظم کراچی پورٹ ٹرسٹ پر قائم ساوٴتھ ایشیاء پاکستان ٹرمینل کا دورہ کریں گے، کراچی پورٹ ٹرسٹ میں ایف بی آر کی کسٹمز کلیئرنس کے خودکار نظام فیس لیس سسٹم کا افتتاح کریں گے، اس نظام کا مقصد کسٹمز کلیئرنس میں شفافیت اور کلیئرنس کے دورانیے میں کمی لانا ہے۔
دورہ کراچی کے دوران وزیراعظم پاکستان سٹاک ایکسچینج کا دورہ بھی کریں گے، جس میں پاکستان سٹاک ایکسچینج کے 2024 میں پوری دنیا کے دوسرے بہترین کارکردگی کے حامل سٹاک ایکسچینج کا اعزاز حاصل کرنے کی تقریب میں بطور مہمان خصوصی شریک ہوں گے۔
دورے کے دوران وزیراعظم آغا خان یونیورسٹی میں ہونے والی ایک تقریب میں بطور مہمان خصوصی بھی شرکت کریں گے۔
