اسلام آباد: وزیراعظم محمد شہباز شریف نے کل جماعتی حریت کانفرنس کے بانی رہنما سید علی گیلانی کی چوتھی برسی پر انہیں زبردست خراج عقیدت پیش کیا ہے۔
وزیراعظم نے اپنے پیغام میں کہا کہ سید علی گیلانی نے اپنی سیاسی بصیرت اور مدبرانہ قیادت کے ذریعے کشمیر اور کشمیری عوام کی آواز کو زندہ رکھا۔ انہوں نے کہا کہ سید علی گیلانی نے اپنی پوری زندگی کشمیر کی آزادی کی جدوجہد کے لیے وقف کی اور کشمیریوں کی تحریک آزادی میں کلیدی کردار ادا کیا۔
شہباز شریف نے کہا کہ سید علی گیلانی کی زندگی کشمیری عوام کے لیے ظالمانہ تسلط کے خلاف مزاحمت کی دائمی علامت ہے۔ ان کی سیاسی تعلیمات کشمیریوں کی نسلوں کے لیے آگاہی اور جدوجہد کی میراث ہیں۔
وزیراعظم نے کہا کہ سید علی گیلانی کا نعرہ "ہم پاکستانی ہیں، پاکستان ہمارا ہے” آج بھی کشمیری عوام کی زبان پر ہے۔
