بانی پی ٹی آئی کی 9 مئی جلاوٴ گھیراوٴ کے مقدمات میں ضمانت کی درخواستیں سماعت کیلئے مقرر

لاہور: لاہور ہائیکورٹ نے بانی پی ٹی آئی عمران خان کی 9 مئی جلاوٴ گھیراوٴ کے مقدمات میں ضمانت کی درخواستیں سماعت کیلئے مقرر کر دیں۔
لاہور ہائیکورٹ کا 2 رکنی بنچ 10 اپریل کو سماعت کرے گا، بنچ میں جسٹس سید شہباز رضوی اور جسٹس طارق سلیم شیخ شامل ہیں۔
عدالت نے سپیشل پراسیکیوٹرز کو دلائل دینے کیلئے طلب کررکھا ہے۔
بانی پی ٹی آئی نے نو مئی کے 8 مقدمات میں ضمانت کی درخواستیں دائر کر رکھی ہیں، عمران خان نے اپنے وکیل بیرسٹر سلمان صفدر کی وساطت سے ضمانتیں دائر کیں، جناح ہاوٴس، عسکری ٹاور، تھانہ شادمان جلاوٴ گھیراوٴ سمیت آٹھ مقدمات میں ضمانت کی درخواستیں دائر کی گئی ہیں۔
علاوہ ازیں لاہور ہائیکورٹ نے ’ایکس‘ کی بندش کے خلاف دائر درخواستیں بھی سماعت کیلئے مقرر کر دیں۔
چیف جسٹس لاہورہائیکورٹ عالیہ نیلم کی سربراہی میں تین رکنی بنچ 8 اپریل کو سماعت کرے گا، بنچ کے دیگر ارکان میں جسٹس فاروق حیدر اور جسٹس علی ضیاء باجوہ شامل ہیں، عدالت نے چیئرمین پی ٹی اے سے تفصیلی جواب طلب کر رکھا ہے۔