پنجاب میں چوبیس گھنٹوں میں آشوب چشم کے 2081 کیسز رپورٹ

لاہور : پنجاب میں آشوب چشم کی وبا میں کمی نہ آسکی، چوبیس گھنٹوں کے دوران لاہور سے 142 جبکہ صوبہ بھر سے 2 ہزار 81 نئے مریض سامنے آگئے۔

محکمہ صحت کے مطابق بہاولپور میں سب سے زیادہ 355 افراد آشوب چشم کا شکار ہوئے جبکہ فیصل آباد میں 142 اور ڈیرہ غازی خان میں 130 نئے مریضوں میں آشوب چشم کی تصدیق ہوئی۔

صوبائی وزیر پرائمری صحت ڈاکٹر جمال ناصر کا کہنا ہے کہ صوبے بھر کے سرکاری ہسپتالوں میں آئی سرجنز کو 24 گھنٹے الرٹ رہنے کی ہدایت کر دی ہے،تمام ہسپتالوں میں آئی ڈراپس بھی وافر مقدار میں مہیا کر دیے گئے ہیں۔

انہوں نے مزید کہا کہ آشوبِ چشم خطرناک نہیں اور نہ ہی اس سے بینائی متاثر ہونے کا خدشہ ہے، آشوب چشم کا مرض 8 سے 10 روز میں ٹھیک ہو جاتا ہے، شہری آنکھوں کی صفائی کا خیال رکھنے کیساتھ ساتھ،تیز دھوپ اور گرد و غبار سے بھی آنکھوں کو بچائیں۔