چیف جسٹس عمرعطاء بندیال کی عہدے پر موجودگی میں نواز شریف کے کیسز حل ہونا مشکل ہے،خرم دستگیر

اسلام آباد:وفاقی وزیر اور مسلم لیگ (ن) کے رہنماانجینئر خرم دستگیر نے کہا ہے کہ چیف جسٹس عمرعطاء بندیال کی عہدے پر موجودگی میں نواز شریف کے کیسز حل ہونا مشکل ہے’پر امید ہوں کہ موسم خزاں میں انتخابات ہوجائیں گے۔

غیر ملکی خبر رساں ادارے” وائس آف امریکہ” کو دیے گئے انٹرویو میں خرم دستگیر نے کہا کہ موجودہ چیف جسٹس کی مسلم لیگ ن کے حوالے سے جانبداری کے بارے میں صرف قیاس نہیں بلکہ واضح نمونے موجود ہیں اور جب تک وہ عہدے پر موجودہ ہیں مشکل ہے کہ نواز شریف کو انصاف مل سکے۔

انہوں نے کہا کہ نواز شریف کی وطن واپسی کے حوالے سے کوئی سیاسی رکاوٹ باقی نہیں البتہ عدالتی مقدمات ہیں۔ خرم دستگیر خان نے کہا کہ سیکیورٹی اداروں نے موسمِ خزاں میں عام انتخابات کے لیے سیکیورٹی فراہم کرنے کی یقین دہانی کرائی ہے۔

خرم دستگیر نے مزید کہا کہ پر امید ہوں کہ اب جبکہ وسائل بھی مہیا ہیں، تحفظ بھی موجود ہے اور ہم سب چاہتے ہیں کہ عوام سے رجوع کیا جائے تو موسم خزاں میں انتخابات ہوجائیں گے۔

انہوں نے کہا کہ ماضی کے تجربے کو دیکھتے ہوئے انتخابی اصلاحات کی گئی ہیں اور اب الیکشن کمیشن کی ذمہ داری ہے وہ انتخابات کو شفاف بنائے۔