‎چینی انجینئرز کی ہلاکت،وزیر اعظم نے سکیورٹی سے متعلق اہم اجلاس آج طلب کر لیا

‎اسلام آباد:وزیر اعظم محمد شہباز شریف نے خودکش حملے میں چینی انجینئرز کی ہلاکت کے بعد آج اعلیٰ سطح کا اہم اجلاس طلب کر لیا۔

‎ وزیر اعظم شہباز شریف کی زیر صدارت ا?ج ہونے والے اعلیٰ سطح کے سکیورٹی اجلاس میں چینی شہریوں کی سکیورٹی سے متعلق امور کا جائزہ لیا جائے گا۔

‎حکومت نے وفاقی کابینہ کا ہنگامی اجلاس بھی کل طلب کر لیا ہے جس میں وفاقی وزراء ، اعلیٰ عسکری حکام اور آئی جیز شریک ہوں گے، اجلاس میں ملک میں امن و امان کی صورتحال پر غور کیا جائے گا۔

‎گزشتہ روز خیبرپختونخوا کے ضلع شانگلہ کے علاقے بشام میں چینی کانوائے پر خودکش حملے میں 5 چینی انجینئرز سمیت 6 افراد ہلاک ہو گئے تھے، حملے میں متعدد افراد زخمی بھی ہوئے ۔

‎ڈی آئی جی مالاکنڈ محمد علی گنڈا پور نے بتایا کہ حملہ خودکش معلوم ہوتا ہے تاہم اس کی تحقیقات جاری ہیں، حملے میں ہلاک ہونے والے 5 غیرملکی باشندے ہیں، گاڑی اسلام آباد سے کوہستان جا رہی تھی کہ راستے میں یہ افسوسناک واقعہ پیش آ گیا۔