وزیراعظم سےعالمی شہرت یافتہ کوہ پیما نائلہ کیانی کی ملاقات، اپنے شعبے سے متعلق اہم تجاویز دیں

اسلام آباد: وزیراعظم شہباز شریف سے عالمی شہرت یافہ پاکستانی کوہ پیما نائلہ کیانی نے ملاقات کی اور اس موقع پر انہوں نے پاکستان میں کوہ پیمائی کے شعبے میں خصوصی تربیت اور ہنر و پیشہ ورانہ تعلیم کے حوالے سے تجاویز پیش کیں۔

وزیراعظم دفتر سے جاری بیان کے مطابق وزیر اعظم شہباز شریف نے ملاقات کے دوران نائلہ کیانی کو حال ہی میں دنیا کی پانچویں بڑی چوٹی مکالو سر کرنے پر مبارک باد پیش کی اور نائلہ کیانی کے بطور اعزازی سفیر برائے تعلیم پاکستان میں تعلیم، کوہ پیمائی کے شعبے کی ترقی اور اس حوالے سے پیشہ ورانہ تربیت کی ترویج کے لیے کام کو بھی سراہا۔

وزیر اعظم نے کہا کہ پاکستان میں خواتین ہر شعبے میں گراں قدر خدمات سر انجام دے رہی ہیں، نائلہ کیانی کا بطور پہلی پاکستانی خاتون کوہ پیما 8 ہزار میٹر سے بلند 11 چوٹیاں سر کرنا قوم کے لیے اعزاز کی بات ہے۔

ان کا کہنا تھا کہ حکومت ملک میں باصلاحیت خواتین کو یکساں ترقی کے مواقع فراہم کرنے کے لیے پر عزم ہے، انفارمیشن ٹیکنالوجی، تعلیم، پیشہ ورانہ تربیت، کھیل اور دیگر شعبوں میں خواتین کو سہولیات فراہم کرنا حکومت کی اولین ترجیحات میں شامل ہے۔

اس موقع پر نائلہ کیانی نے وزیر اعظم کا ملک میں خواتین کی ترقی پر خصوصی توجہ دینے پر شکریہ ادا کیا اور وزیراعظم کو پاکستان میں کوہ پیمائی کے شعبے میں خصوصی تربیت اور ہنر و پیشہ ورانہ تعلیم کے حوالے سے تجاویز پیش کیں۔

وزیرِ اعظم نے متعلقہ حکام کو ان تجاویز پر عمل درآمد کے لیے ایک جامع لائحہ عمل بنا کر پیش کرنے کی ہدایت کر دی۔