ہم معاملات کو سدھارنا چاہتے ہیں لیکن حکومت معاملات کو خراب کرنا چاہتی ہے،شاہ محمود قریشی

اسلام آباد: پاکستان تحریک انصاف کے رہنما شاہ محمود قریشی کاکہناہے کہ سرکاری اہلکار جلتی پر تیل کا کام کررہے ہیں۔ ہم معاملات کو سدھارنا چاہتے ہیں مگر حکومت معاملات کوخراب کرناچاہتی ہے

میڈیا سے گفتگو کرتے ہوئے پاکستان تحریک انصاف کے وائس چیئرمین شاہ محمود قریشی نے کہا کہ ہم لوگوں کو کہہ رہے ہیں کہ قانون ہاتھ میں نہ لیں۔ میرے دفتر پر چھاپا مارا گیا ہے۔ پنجاب کی پولیس خواتین پر تشدد کررہی ہے۔

پی ٹی آئی رہنماء نے کہا کہ ہمارا احتجاج قانون کے دائرے میں رہ کر جاری رہے گا۔ سرکاری اہلکار جلتی پر تیل کا کام کررہے ہیں۔ ہم معاملات کو سدھارنا چاہتے ہیں مگر حکومت معاملات کوخراب کرناچاہتی ہے۔

شاہ محمود قریشی کا کہنا تھا کہ خدارا لوگوں کومشتعل نہ کیجیے۔ لوگوں کے جذبات مجروح ہیں،ان کوٹھنڈاکرنیکی ضرورت ہے۔ ہم لوگوں کو ٹھنڈا کررہے ہیں۔ یہ لوگ ہمارے گھروں پر حملے کررہے ہیں۔ میری کسی سرکاری اہل کار سے کوئی بات نہیں ہوئی۔