ایشین گیمز، پاکستان کرکٹ ٹیم سیمی فائنل میں پہنچ گئی

ہانگژو: ایشین گیمز کے کرکٹ مقابلوں میں پاکستان ہانگ کانگ کو 68 رنز سے شکست دیکر سیمی فائنل میں پہنچ گیا۔

چین کے شہر ہانگژو میں جاری ایشین گیمز کے ٹی 20 کرکٹ مقابلوں کے کوارٹر فائنل میں ہانگ کانگ نے ٹاس جیت کر پہلے فیلڈنگ کا فیصلہ کیا تاہم پاکستان نے مقررہ 20 اوورز میں 160 رنز بنائے۔

161 رنز کے ہدف کے تعاقب میں ہانگ کانگ کی پوری ٹیم 18.5 اوورز میں 92 رنز بنا کر آؤٹ ہوگئی، پاکستان کی جانب سے خوشدل شاہ نے تین جبکہ قاسم اکرم، عرفات منہاس اور سفیان مقیم نے دو دو وکٹیں حاصل کیں۔

سیمی فائنل میں پاکستان شاہینوں کا مقابلہ سری لنکا اور افغانستان کے میچ کی فاتح ٹیم سے6 اکتوبر کو ہوگا۔