لکی مروت میں سکیورٹی فورسز سے فائرنگ کا تبادلہ، 2 دہشتگرد ہلاک، 2 جوان شہید

لکی مروت: ضلع لکی مروت میں سکیورٹی فورسز اور دہشت گردوں کے درمیان فائرنگ کے تبادلے میں 2 دہشت گرد ہلاک جبکہ 2 جوان شہید ہوگئے۔

آئی ایس پی آر کے مطابق ہلاک ہونے والے دہشتگردوں کی شناخت آفتاب عرف ملنگ اور مسعود شاہ کے نام سے ہوئی ہے، دونوں دہشتگرد سکیورٹی فورسز پر حملوں اور شہریوں کی ٹارگٹ کلنگ میں ملوث تھے، ہلاک ہونے والے دہشتگردوں سے اسلحہ اور گولہ بارود برآمد کر لیا۔

آئی ایس پی آر کا کہنا ہے کہ شہداء میں بھمبر آزاد کشمیر کے سپاہی محمد افضل اور مانسہرہ کے رہائشی سپاہی ابرار حسین شامل ہیں، علاقے میں دہشت گردوں کے خاتمے کیلئے سینی ٹائزیشن آپریشن جاری ہے، سکیورٹی فورسز ملک سے دہشت گردی کی لعنت کو ختم کرنے کیلئے پرعزم ہیں۔

آئی ایس پی آر کا کہنا ہے کہ بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔