جماعت اسلامی دھرنا، راولپنڈی انتظامیہ کا شرکاء کو مکمل سیکیورٹی فراہم کرنے کا حکم

راولپنڈی: ضلعی انتظامیہ نے جماعت اسلامی کے دھرنے میں شامل شرکاء کو مکمل سیکیورٹی اور تمام ضروری سہولیات فراہم کرنے کا حکم دے دیا۔

ایڈیشنل ڈپٹی کمشنر جنرل نے باقاعدہ نوٹیفکیشن جاری کر دیا جس میں میونسپل کارپوریشن، واسا اور پی ایچ اے سربراہان کو تمام سہولیات کی فراہمی کی ہدایات دی گئی ہے۔

نوٹیفکیشن کے مطابق شرکاء کی سیکیورٹی اور سہولیات کے لیے اسٹاف مشینری فراہم کی جائے۔

یاد رہے کہ ملک میں مہنگائی اور مہنگی بجلی کے خلاف جماعت اسلامی کا راولپنڈی کے لیاقت باغ میں دھرنا تیسرے روز بھی جاری ہے۔

گزشتہ روز وفاقی حکومت سے مذاکرات کے لیے جماعت اسلامی نے لیاقت بلوچ کی سربراہی میں کمیٹی تشکیل دی تھی۔ مذاکرات کا پہلا دور آج ہونے کا امکان ہے۔