جے یو آئی کا جنوری میں عام انتخابات کے الیکشن کمیشن کے اعلان کا خیر مقدم

اسلام آباد : جمعیت علمائے اسلام ( ف) نے جنوری میں عام انتخابات کے الیکشن کمیشن کے اعلان کا خیر مقدم کرتے ہوئے کہا ہے کہ ہم ملک میں غیر جانبدار الیکشن کے خواہاں ہیں۔

جمعیت علماء اسلام کے سیکرٹری جنرل مولانا عبدلغفور حیدری نے ایک بیان میں کہا ہے کہ جے یو آئی نے ہمیشہ بروقت شفاف انتخابات کا مطالبہ کیا ہے ۔ ہماری نظر میں شفاف اور غیر جانبدار الیکشن ہی ملک میں سیاسی اور معاشی استحکام کا باعث ہے ۔

انہوں نے کہا کہ ہم نے الیکشن کمیشن پر واضح کردیا ہے کہ اگر انتخابات میں 2018 کی تاریخ دہرائی گئی تو سخت مزاحمت کا سامنا ہوگا۔

مولانا عبدالغفورحیدری نے کہا ہر ضلع کے الیکشن کمیشن آفسر کو آر او کے اختیارات دئیے جائیں تاکہ الیکشن کی شفافیت پر سوال نہ اٹھے ۔