اقوام متحدہ اجلاس کے موقع پر شہباز اور جوبائیڈن ملاقات طے نہیں، منیر اکرم

نیویارک: اقوام متحدہ میں پاکستان کے مستقل مندوب منیر اکرم نے کہا ہے کہ یو این اجلاس کے موقع پر وزیراعظم شہباز شریف اور امریکی صدر جوبائیڈن کی ملاقات طے نہیں۔

امریکی میڈیا کو انٹرویو دیتے ہوئے منیر اکرم کا کہنا تھا کہ وزیراعظم شہباز شریف جنرل اسمبلی اور سلامتی کونسل میں خطاب کریں گے، ان کی اقوام متحدہ کے سیکرٹری جنرل اور دیگر اہم ممالک کے سربراہان سے ملاقات ہوگی۔

انہوں نے کہا کہ جغرافیہ نہیں بدل سکتا ہمسایہ ممالک کے ساتھ ہمیں تعلق رکھنا ہی ہے، افغان طالبان کی بہت سی پالیسیوں سے اختلاف کے باوجود رابطے ضروری ہیں، کئی مسائل ہیں لیکن ہمارا تعلق افغان عوام سے ہے۔

ان کا کہنا تھا کہ افغان حکومت کے ساتھ اختلافات کے حل کیلئے کام کریں گے، ہمیں اپنی سکیورٹی کیلئے جو ایکشن لینا ہے وہ لے رہے ہیں۔

منیر اکرم نے کہا کہ جہاں سفارت کاری کی ضرورت ہے وہاں سفارتی کوششیں جاری رکھیں گے، ہمارا مؤقف برقرار ہے افغانستان کے منجمد اثاثے بحال کئے جائیں، ہم افغان عوام کی مدد اور ان کی حکومت کی غلطیاں درست کرنا چاہتے ہیں۔

اقوام متحدہ میں پاکستان کے مستقل مندوب کا کہنا تھا کہ افغانستان سے متعلق ہماری جامع پالیسی جاری رہے گی۔