شاہد آفریدی کی نگران وزیراعظم ،چیئرمین پی سی بی سے ملاقات، پی سی بی میں اہم ذمہ داری ملنے کا امکان

اسلام آباد/لاہور: نگران وزیراعظم انوارالحق کاکڑ اورچیئرمین پی سی بی مینجمنٹ کمیٹی ذکا اشرف سے قومی کرکٹ ٹیم کے سابق کپتان شاہد آفریدی نے ملاقات کی ہے۔

ملاقات میں کرکٹ سے متعلقہ امور پر بات چیت ہوئی جس میں نگران وزیراعظم نے کہا کہ کرکٹ کی بہتری کیلئے شاہد آفریدی اپنا کردار ادا کریں۔

نگران وزیراعظم نے چیئرمین پی سی بی مینجمنٹ کمیٹی ذکا اشرف سے بھی رابطہ کیا اور کہا کہ کرکٹ کی بہتری میں سینئر کھلاڑیوں سے مشاورت کی جائے۔

دوسری جانب سابق کپتان شاہد خان آفریدی نے چئیرمین پی سی بی مینجمنٹ کمیٹی ذکاء اشرف چوہدری سے اہم ملاقات کی۔

ذرائع کے مطابق پاکستان کرکٹ بورڈ ہیڈ کوارٹر میں چیئرمین پی سی بی مینجمنٹ کمیٹی ذکا اشرف اور سابق کپتان شاہد آفریدی کے درمیان ہونیوالی ملاقات میں کرکٹ امور میں بہتری کے لئے بات چیت ہوئی۔

ذرائع کا کہنا ہے کہ سابق کپتان شاہد آفریدی نے وزیر اعظم انوارالحق کاکڑ کی ہدایت پر ذکاء اشرف سے ملاقات کی، شاہد آفریدی کی چند روز قبل وزیراعظم انوار الحق کاکڑ سے ملاقات بھی ہوئی تھی ۔

ذرائع کے مطابق شاہد آفریدی کو پی سی بی میں انتہائی اہم زمداری ملنے کا امکان ہے، وزیر اعظم سے ملاقات میں شاہد آفریدی کو کرکٹ میں بہتری کے لئے اپنا کردار ادا کرنے کو کہا گیا تھا۔