ظل شاہ قتل کیس ، عمران خان نے عبوری ضمانت کیلئے درخواست دائر کر دی

لاہور: پاکستان تحریک انصاف کے چیئرمین عمران خان نے ظل شاہ قتل کیس میں عبوری ضمانت کیلئے لاہور ہائی کورٹ میں درخواست دائر کر دی۔درخواست میں عمران خان نے استدعا کی ہے کہ لاہور ہائیکورٹ عبوری ضمانت منظور کرنے کا حکم دے۔

سابق وزیراعظم عمران خان نے اپنے وکیل بیرسٹر سلمان صفدر کی وساطت سے درخواست دائر کی، سکیورٹی خدشات کے پیش نظر عمران خان کی جانب سے سیشن کورٹ کے بجائے ہائیکورٹ میں عبوری ضمانت دائر کی گئی ہے۔

درخواست میں موٴقف اختیار کیا گیا ہے کہ تھانہ سرور روڈ پولیس نے بے بنیاد اور جھوٹا مقدمہ درج کیا ہے، حکومت کی جانب سے سیاسی انتقام کا نشانہ بنایا جا رہا ہے۔

عمران خان نے درخواست میں استدعا کی ہے کہ لاہور ہائیکورٹ عبوری ضمانت منظور کرنے کا حکم دے۔

بعد ازاں درخواست ضمانت پر پیشی کیلئے سابق وزیراعظم عمران خان نے گاڑی ہائیکورٹ کے اندر لانے کیلئے رجسٹرار آفس سے اجازت طلب کی ہے۔

عمران خان کی جانب سے کہا گیا ہے کہ مقدمے میں پیشی کیلئے ہائیکورٹ پیش ہونا ہے، سکیورٹی خدشات ہیں، گاڑی لاہور ہائیکورٹ کے اندر آنے کی اجازت دی جائے۔