اسلام آباد:سپریم کورٹ میں بانی پی ٹی آئی کے وکیل سردارلطیف کھوسہ نے چیف جسٹس آف پاکستان جسٹس یحییٰ آفرید ی کے نام خط لکھ کربانی پی ٹی آئی کی میڈیکل رپورٹس فراہم کرنے کا مطالبہ کردیا۔
سپریم کورٹ میں بانی پی ٹی آئی کے وکیل سردارلطیف کھوسہ نے چیف جسٹس یحییٰ آفرید ی کے نام خط میں بانی پی ٹی آئی کی طبی صورتحال پر تشویش کا اظہار کیا ہے۔انہوں نے کہا کہ بانی پی ٹی آئی کی گرتی ہوئی صحت اہلخانہ اور عوام کیلئے تشویش کا باعث ہے۔
خط میں سردارلطیف کھوسہ نے کہا کہ بانی پی ٹی آئی کے ذاتی معالجین ڈاکٹر فیصل اور ڈاکٹر عاصم کو معائنے کی اجازت دی جائے اوربانی پی ٹی آئی کو الشفاء ہسپتال منتقل کرنے کا حکم دیا جائے۔
خط کے متن میں کہاگیاہے کہ بیماری کے دوران بھی بانی پی ٹی آئی کو بنیادی سہولیات سے محروم رکھا گیا۔عدالتی حکم پر بانی پی ٹی آئی کا طبی معائنہ ہوا لیکن اہلخانہ کو لاعلم رکھا گیا۔ دعویٰ کیا گیا کہ اہلخانہ اور پارٹی قائدین کو بلایا گیا لیکن وہ نہیں آئے۔
سردارلطیف کھوسہ نے خط میں مزید کہا کہ بانی پی ٹی آئی کے اہلخانہ اور پارٹی قیادت کو طبی معائنے کے وقت بلانے کا دعویٰ بالکل غلط ہے۔اہلخانہ کو آگاہ کیے بغیر خفیہ طبی معائنے نے کئی خدشات کو جنم دیا ہے۔طبی معاملے سے اہلخانہ کو باہر رکھنے سے پریشانی اور خدشات میں اضافہ ہو رہا ہے۔لطیف کھوسہ کے خط میں بانی پی ٹی آئی کی میڈیکل رپورٹس فراہم کرنے کا مطالبہ کیاہے ۔
