ریاض:ایران کے صدر مسعود پزشکیان نے کہا ہے کہ خطے میں پائیدارامن کے خواہاں ہیں۔ ایران کے خلاف دھمکیوں سے خطہ عدم استحکام کا شکار ہوگا۔
سعودی ولی عہد محمد بن سلمان سے ٹیلیفون پر گفتگو میں مسعود پزشکیان نے خطےکی صورتحال پر تبادلہ خیال کرتے ہوئے کہا کہ عالمی قانون کے تحت جنگ سے بچاؤ کے کسی بھی اقدام کا خیر مقدم کرتے ہیں۔اسلامی ممالک کا اتحاد خطے میں پائیدار سلامتی، استحکام اور امن کی ضمانت بن سکتا ہے۔
سعودی ولی عہد کا کہنا تھا کہ سعودی عرب ایران کے خلاف کسی بھی قسم کی جارحیت کو مستردکرتاہے۔محمد بن سلمان نے واضح کیا کہ مملکت اپنی فضائی حدود یا سرزمین کو ایران کے خلاف کسی بھی فوجی کارروائی کے لیے استعمال کرنے کی اجازت نہیں دے گی۔
دونوں رہنماوں کے درمیان بات چیت ایسے وقت میں ہوئی ہے جب امریکی فوج کا یو ایس ایس ابراہم لنکن ائیر کرافٹ کیریئر اور اس کے ساتھ موجود دیگر جنگی جہازوں پر مشتمل بحری بیڑا مشرق وسطیٰ پہنچ چکا ہے۔
