مالی سال 25ء کی تیسری سہ ماہی میں ڈیجیٹل ادائیگیوں میں نمایاں اضافہ، اسٹیٹ بینک کا جائزہ جاری

اسلام آباد: اسٹیٹ بینک آف پاکستان نے مالی سال 25ء کی تیسری سہ ماہی کے لیے ادائیگیوں کے نظام کا جائزہ جاری کر دیا ہے جس میں ڈیجیٹل ٹرانزیکشنز میں نمایاں اضافے کی نشاندہی کی گئی ہے۔
رپورٹ کے مطابق ریٹیل ادائیگیوں کا حجم 12 فیصد اضافے سے 2,408 ملین ٹرانزیکشنز اور مالیت 8 فیصد اضافے سے 164 ٹریلین روپے تک پہنچ گئی۔
ڈیجیٹل ذرائع سے کی جانے والی ٹرانزیکشنز کا حصہ 89 فیصد رہا جبکہ موبائل ایپ پر مبنی پلیٹ فارمز سے 27 ٹریلین روپے کی 1,686 ملین ٹرانزیکشنز پروسیس ہوئیں۔
ای کامرس ادائیگیوں میں بھی 40 فیصد اضافہ دیکھا گیا۔ اسٹیٹ بینک کے فوری ادائیگی کے نظام "راست” کے ذریعے 8.5 ٹریلین روپے کی 371 ملین ٹرانزیکشنز کی گئیں۔
اسٹیٹ بینک کے مطابق ڈیجیٹل معیشت کی جانب منتقلی کے لیے ادارے، بینک اور فن ٹیک کمپنیاں مشترکہ طور پر سرگرم ہیں اور مالی شمولیت کے فروغ کے لیے اقدامات جاری رہیں گے۔