لکھنوٴ: آئی سی سی ون ڈے ورلڈکپ کے 14 ویں میچ میں سری لنکا نے آسٹریلیا کے خلاف چار وکٹوں کے نقصان پر 32.1 اوورز میں 178 رنز بنا لیے، میچ کو بارش کے باعث روک دیا گیا۔
آسٹریلیا اور سری لنکا کے درمیان کرکٹ ورلڈکپ 2023 کا یہ میچ بھارتی شہر لکھنوٴ کے اکانا کرکٹ سٹیڈیم میں کھیلا جارہا ہے۔
سری لنکا کی ٹیم میں آج کے میچ کیلئے 2 تبدیلیاں کی گئی ہیں، انجری کا شکار کپتان داسن شناکا اور متھیشا کی جگہ چمیکا اور کمارا کو سکواڈ میں شامل کیا گیا ہے۔
ٹاس کے موقع پر گفتگو کرتے ہوئے سری لنکا کے کپتان کوشال مینڈس نے کہا کہ وکٹ اچھی لگ رہی ہے، ہمیں انجری مسائل کا سامنا ہے، اس وکٹ پر 200 سے 300 رنز کا اچھا سکور ہو گا۔
آسٹریلیا کے کپتان پیٹ کمنز نے کہا کہ پچھلے ایک دو دن اچھی ٹریننگ کی۔
خیال رہے کہ میگا ایونٹ میں دونوں ہی ٹیمیں پہلی کامیابی کی منتظر ہیں، دونوں ٹیموں نے میگا ایونٹ میں اب تک 2، 2 میچز کھیلے ہیں، لیکن دونوں ٹیموں کو کامیابی نہیں ملی ہے۔
آسٹریلیا کو بھارت اور جنوبی افریقا نے ہرایا ہے جبکہ سری لنکا کو بھی جنوبی افریقا اور پاکستان کے ہاتھوں شکست کا منہ دیکھنا پڑا ہے۔
