اسلام آباد:اسلام آباد ہائی کورٹ نے چیئرمین پی ٹی آئی کی جانب سے وزیر دفاع خواجہ آصف کے خلاف 10 ارب روپے کے ہرجانہ کیس میں ٹرائل کورٹ کی جانب سے خواجہ آصف کی اضافی دستاویزات جمع کرانے کی درخواست منظور کرنے کے عدالتی حکم کے خلاف درخواست پر فیصلہ محفوظ کر لیا ہے ۔
اسلام آباد ہائی کورٹ کے چیف جسٹس عامر فاروق نے چیئرمین پی ٹی آئی کی درخواست پر سماعت کی جس میں ٹرائل کورٹ کے اس آرڈر کو چیلنج کیا گیا تھا جس میں خواجہ آصف کی جانب سے اضافی دستاویزات جمع کرانے کی درخواست منظور کی گئی تھی۔
پٹیشنرچیئرمین پی ٹی آئی کی جانب سے بیرسٹر ولید اقبال عدالت میں پیش ہوئے۔ خواجہ آصف کے وکیل نے بتایا کہ خواجہ آصف نے کچھ دستاویزات دیں اور ترمیم کی جسے ٹرائل کورٹ نے منظور کیا۔
عدالت نے استفسار کیا کہ کیا یہ دستاویزات دوران جرح سامنے آئی تھیں ؟وکیل نے کہا میں اس پر تفصیل سے آتا ہوں پہلے سیشن کورٹ کا آرڈر پڑھ لیتے ہیں۔ خواجہ آصف کے وکیل نے سیشن کورٹ کا آرڈر پڑھ کر سنایا جس کے بعد عدالت نے فیصلہ محفوظ کر لیا۔
ٹرائل کورٹ نے ہرجانہ کیس میں خواجہ آصف کی اضافی دستاویزات جمع کرانے کی درخواست منظور کی تھی جس کے خلاف چیئرمین پی ٹی آئی نے ہائی کورٹ سے رجوع کیا تھا۔
