لاہور:قومی احتساب بیورو ( نیب ) کے چئیرمین لیفٹیننٹ جنرل (ر) نذیر احمد کا کہنا ہے کہ ماضی میں نیب سیاسی مقاصد کیلئے استعمال ہوتا رہا ہے، ہمیں اپنی کمزوریوں کا احساس ہے۔نیب کو مکمل طور پر غیر سیاسی بنا کر دم لیں گے۔
تقریب سے خطاب کرتے ہوئے چیئرمین نیب لیفٹیننٹ جنرل (ر) نذیر احمد نے کہا کہ نیب کو ماضی میں سیاسی ٹول کے لیے بھی استعمال کرنے کی کوشش کی گئی اور کیا بھی گیا، نیب گزشتہ کچھ عرصے میں تنازعات کا شکار بھی رہا، ہمیں اپنی کوتاہیوں اور کمزوریوں کا ادراک ہے۔
انہوں نے کہا نیب کی ساکھ بحال کرنے کیلئے اقدامات کررہے ہیں، نیب اپنی اصلاح کرے گا اور کررہا ہے، ہم عوام کا اعتماد حاصل کریں گے، اس قوم اور ملک نے جو ہمیں ذمہ داری بخشی ہے اس کو ہم پورا کریں گے۔
ان کا کہنا تھا کہ نیب نے اس ملک اور معاشرے کی بے پناہ خدمت کی ہے، کرپشن کیسز میں بالواسطہ اور بلاواسطہ ریکوریز ہورہی ہیں، ہم اگلے چند ماہ میں قانون سازی کریں گے۔
چیئرمین نیب نے مزید کہا بدعنوانی کے خاتمے میں ہمارا کوئی فیورٹ یا دشمن نہیں، نیب کو مکمل طور پر غیر سیاسی بنا کر دم لیں گے، ہمیں ادارے کو عقوبت خانہ نہیں بنانا۔
