پاکستان تحریک انصاف کے ترجمان رؤف حسن کا کہناہے کہ اعظم چودھری جبر و آمریت کے اس سیاہ ترین راج کا تازہ ترین شکار ہیں جو پچھلے 14 ماہ سےآئین، قانون، جمہوری اقدار اور ہماری تہذیبی و معاشرتی روایات کو نگل رہا ہے۔
سماجی رابطے کی ویب سائٹ ٹویٹر پر اپنے ٹویٹ میں رؤف حسن نے کہا کہ وزیرآعظم سے ایک سوال پوچھنے کی پاداش میں انہیں سرکاری ٹیلیوژن کے پروگرام سے الگ کر دیا گیا-
ترجمان پی ٹی آئی نے کہا کہ بنیادی آئینی حقوق کے مجموعی قتلِ عام کے ساتھ ریاستی قوت سےآزادئ اظہار کو کچلنے کا ایجنڈا شرم و حیا کے احساس سے مکمل عاری آگے بڑھایا جارہا ہے۔
ترجمان پی ٹی آئی نے مزید کہا کہ ارشدشریف کے بہیمانہ قتل، عمران ریاض کی جبری گمشدگی، امپورٹڈ سرکار کے ناقد صحافیوں کی جلاوطنی، ملک میں موجود تنقیدی مزاج رکھنے والے اہلِ صحافت کی نوکریوں سے محرومی اور چیئرمین سمیت پاکستان کی سب سے بڑی اور واحد وفاقی جماعت کے قائدین کی قومی ذرائع ابلاغ میں تحریر و تقریر پر عائد غیرقانونی، غیرآئینی اور بلاجواز پابندی دنیا کے سامنے پاکستان کے جمہوری تشخص کو بری طرح مجروح کررہی ہے۔
