نیویارک : امریکا کی ریاست الاسکا میں شدید زلزلہ آیا ہے جس کے بعد سونامی کی وارننگ جاری کر دی گئی ہے۔
خبر رساں ایجنسی کے مطابق جیولوجیکل سروے (یو ایس جی ایس) کے مطابق مقامی وقت کے مطابق ہفتہ کی رات الاسکا کے جزیرہ نما میں 7.2 شدت کے زلزلہ نے علاقے کو ہلا کر رکھ دیا۔
امریکی زلزلہ پیما مرکز کے مطابق جزیرہ نما الاسکا میں آنے والے زلزلے کی شدت 7.2 ریکارڈ کی گئی ہے، یو ایس جی ایس نے پہلے زلزلے کی شدت کو 7.4 بتایا تھا جس کو بعد ازاں کم کیا گیا۔
امریکی زلزلہ پیما مرکز کابتانا ہے کہ الاسکا میں زلزلہ 9.3 کلو میٹر کی گہرائی میں آیا، زلزلے کا مرکز الاسکا کے ایک چھوٹے سے قصبے سینڈ پوائنٹ سے 89 کلومیٹر جنوب میں تھا۔
ادھر امریکی سونامی سسٹم کے مطابق زلزلے کے قریب واقع بحر الکاہل کے علاقوں کے لیے سونامی کی وارننگ جاری کی گئی ہے۔
الاسکا زلزلہ کے لحاظ سے فعال پیسیفک ’رنگ آف فائر‘ کا حصہ ہے۔
خیال رہے کہ امریکہ کی یہ ریاست مارچ 1964 میں 9.2 شدت کے زلزلے کی زد میں آئی تھی جو کہ شمالی امریکہ میں اب تک کا سب سے شدید زلزلہ تھا۔
زلزلے نے علاقے کو تباہ کر دیا تھا اور سمندر میں سونامی کی لہروں خلیج الاسکا، امریکی مغربی ساحل اور ہوائی کو لپیٹ میں لے لیا تھا ، زلزلے اور سونامی سے 250 سے زائد جان کی بازی ہار گئے تھے۔
