اسلام آباد: وفاقی وزیر خزانہ محمد اورنگزیب نے کہا ہے کہ پاکستان کی معیشت بتدریج بہتری کی جانب بڑھ رہی ہے اور حکومت معاشی شعبے میں ادارہ جاتی اصلاحات پر عمل درآمد جاری رکھے ہوئے ہے۔
اسلام آباد میں پاکستان-یورپی یونین بزنس فورم سے خطاب کرتے ہوئے انہوں نے بتایا کہ مارچ میں کرنٹ اکاؤنٹ ایک ارب ڈالر سے زائد سرپلس رہا، جبکہ رواں مالی سال کے ابتدائی نو ماہ میں بھی یہ رجحان برقرار ہے۔
وزیر خزانہ کے مطابق جون تک زرمبادلہ کے ذخائر 18 ارب ڈالر تک پہنچنے کی توقع ہے، جبکہ جی ڈی پی کی شرح نمو تقریباً 4 فیصد رہنے کا امکان ظاہر کیا جا رہا ہے۔ انہوں نے روشن ڈیجیٹل اکاؤنٹ کو ایک مؤثر اقدام قرار دیا۔
محمد اورنگزیب نے مزید کہا کہ یورو بانڈ کی بروقت ادائیگی یقینی بنائی گئی ہے، جبکہ قرضوں کی ادائیگی میں کمی سے حاصل ہونے والی مالی گنجائش کو آئندہ بجٹ میں دیگر شعبوں کے لیے استعمال کیا جائے گا۔
