نہتے فلسطینیوں پر طاقت کے وحشیانہ استعمال پر اعلیٰ امریکی عہدیدار بھی بول اٹھے

واشنگٹن: نہتے فلسطینیوں کیخلاف طاقت کا وحشیانہ استعمال کرنے پر امریکی قومی سلامتی کے مشیر نے اسرائیل کو آئینہ دکھا دیا۔

امریکی نیوز چینل سے گفتگو کرتے ہوئے امریکا کے قومی سلامتی کے مشیر جیک سلیوان نے کہا ہے کہ اسرائیل جنگ میں فلسطینی شہریوں اور حماس کے جنگجوؤں میں فرق کرے۔

جیک سلیوان نے مزید کہا ہے کہ غزہ پر حملوں میں فلسطینیوں اور حماس کے درمیان پہچان ضروری ہے، زمینی اور فضائی حملوں میں شہریوں کی حفاظت یقینی بنائی جائے۔

خیال رہے غزہ میں صیہونی فورسز کی جانب سے نہتے شہریوں پرشدید بمباری جاری ہے، زمینی، فضائی اور بحریہ کے حملوں میں مزید 300 سے زائد فلسطینی شہید ہو گئے۔

فلسطینی وزارت صحت کا کہنا ہے کہ اسرائیلی فورسز کے حملوں میں اب تک شہید ہونے والے فلسطینیوں کی تعداد 8 ہزار ہو گئی جن میں 3600 بچے اور 1900 سے زائد خواتین شامل ہیں۔