نیویارک: مشہور امریکی اداکار اور صداکار جیمز ارل جونز 93 برس کی عمر میں انتقال کرگئے۔
جیمز ارل جونز نے ’اسٹار وارز‘ میں ڈارتھ ویڈر اور ’لائن کنگ‘ میں مفاسا جیسے کرداروں کو اپنی جاندار آواز سے امر کردیا تھا۔
انہوں نے اپنی طویل فنی زندگی میں کئی یادگار فلموں میں اداکاری کے جوہر دکھائے، جن میں روٹس، کمنگ ٹو امریکا اور دا ہنٹ فار ریڈ اکتوبر شامل ہیں۔
ان کی غیرمعمولی کارکردگی کو سراہتے ہوئے انہیں ایک آسکر، ایک گریمی، 3 ایمی اور 3 ٹونی ایوارڈز سے نوازا گیا۔
صداکاری کے میدان میں بھی جیمز کی خدمات بے پناہ تھیں، انہوں نے کئی ٹی وی اشتہارات اور ڈاکومنٹریز میں اپنی آواز کا جادو جگایا۔
معروف امریکی نشریاتی ادارے سی این این نے بھی برسوں تک ان کی آواز میں اپنی ٹیگ لائن کا استعمال کیا۔
دلچسپ بات یہ ہے کہ بچپن میں ہکلانے کی عادت نے جیمز ارل جونز کو خاموش کر دیا تھا لیکن ان کے ایک استاد نے ان کی شاعری سے دلچسپی کو دیکھتے ہوئے انہیں کلاس میں شعر باآواز بلند پڑھنے کو کہا، جس سے ان کی ہکلانے کی عادت کم ہوئی اور یوں انہوں نے صداکاری کی دنیا میں قدم رکھا۔
