اسلام آباد:حکومت نے عوام کوپٹرولیم مصنوعات کی قیمتوں میں کمی کا مسلسل چوتھا تحفہ دیتے ہوئے پیٹرولیم مصنوعات کی قیمتوں میں 13.60روپے فی لیٹر تک کمی کردی ہے۔
وزیراعظم نے اوگرا کی طرف سے پٹرولیم مصنوعات کی قیمتوں میں کمی کا پورا ریلیف عوام کو منتقل نہ کرنے کی تجویز مسترد کردی۔
وزیراعظم کی منظوری کے بعد وزارتِ خزانہ نے پٹرولیم مصنوعات کی قیمتوں میں کمی کا نوٹیفکیشن جاری کردیا۔ نئی قیمتوں کا اطلاق رات بارہ بجے سے ہوگا۔
وزارتِ خزانہ کے مطابق پٹرول کی قیمت میں 10 روپے فی لیٹر کمی کردی گئی ہے جبکہ ہائی اسپیڈ ڈیزل کی قیمت میں 13 روپے 6 پیسے فی لیٹر کمی کی گئی ہے اس کے علاوہ مٹی کا تیل 11 روپے 15 پیسے فی لیٹر سستا کردیاگیا ہے۔
لائٹ ڈیزل آئل کی قیمت میں 12 روپے 12 پیسے کمی کی گئی ہےپٹرول کی قیمت 10 روپے فی لٹر کمی کے بعد 249.10 روپے فی لٹر ہوگئی ہے۔
ہائی سپیڈ ڈیزل کی قیمت 13 روپے 6 پیسے کمی کے بعد 249.69 روپے فی لٹر مقرر کی گئی ہےلائٹ ڈیزل آئل کی قیمت 12 روپے 12 پیسے فی لٹر کم ہو کر 141.93 روپے ہوگئی ہے، مٹی کے تیل کی قیمت 11 روپے پندرہ پیسے فی لٹر کم ہو کر 158.47 روپے فی لٹر ہوگئی ہےپیٹرولیم مصنوعات کی نئی قیمتوں کا اطلاق رات بارہ بجے سے ہوگاجو اگلے پندرہ روز کیلئے لاگو رہیں گی۔
ذرائع کا کہنا ہے کہ پٹرولیم مصنوعات کی قیمتوں میں ردوبدل کے حوالے سے جائزہ لینے سے متعلق اجلاس میں وزیراعظم میاں شہباز شریف کو تجویز دی گئی تھی کہ پٹرولیم مصنوعات کی قیمتوں میں کمی کا پورا ریلیف عوام کو منتقل نہ کیا جائے تاہم وزیر اعظم نے یہ تجویز مسترد کردی اور موقف اختیار کیا کہ عوام گذشتہ چند سالوں سے مسلسل مہنگائی کا شکار ہے اب جبکہ عالمی منڈی میں تیل کی قیمتوں میں کمی کے باعث عوام کو زیادہ ریلیف ملنے جارہا ہے تو اس میں کمی نہیں کی جائے گی اور مروجہ طریقہ کار کے مطابق جو کمی بنتی ہے وہ پوری عوام کو منتقل کی جائے گی کیونکہ جب عالمی منڈی میں تیل کی قیمتوں میں اضافے کے باعث مقامی مارکیٹ میں ہونے والا اضافہ عوام کو منتقل کیا جاتا رہا ہے تو اب کمی بھی پوری عوام کو منتقل کی جائے ۔
ذرائع کا کہنا ہے کہ وزیراعظم کی منظوری کے بعد پٹرولیم مصنوعات کی قیمتوں میں کمی کا نوٹیفکیشن جاری کردیا گیا ہے جس میں عالمی منڈی میں تیل کی قیمتوں میں کمی کے تناسب کے اعتبار سے جو کمی بنتے تھی وہ پوری کمی عوام کو منتقل کی گئی ہے
