اسلام آباد:وزیراعظم شہباز شریف سے اہم شخصیات نے ملاقاتیں کیں ، ملکی ترقی اور سیکیورٹی امور پر تبادلہ خیال کیا گیا ۔
وزیراعظم محمد شہباز شریف سے وزیر اعلیٰ بلوچستان سرفراز بگٹی اور وزیر داخلہ محسن رضا نقوی نے علیحدہ علیحدہ ملاقاتیں کیں، جن میں ملکی ترقی، امن و امان اور دیگر اہم امور پر گفتگو ہوئی۔
وزیر اعلیٰ بلوچستان نے وزیراعظم کو عید الفطر کی مبارکباد دی اور بلوچستان میں جاری اقتصادی، سماجی اور امن و امان کی صورتحال پر تبادلہ خیال کیا۔
ملاقات میں وفاقی حکومت کے تحت جاری ترقیاتی منصوبوں پر بھی گفتگو ہوئی، اور سرفراز بگٹی نے وزیراعظم کو بلوچستان میں ترقیاتی کاموں کی پیشرفت سے آگاہ کیا۔
وزیراعظم نے اس موقع پر کہا کہ بلوچستان کی ترقی وفاقی حکومت کی اولین ترجیح ہے اور اس سلسلے میں ہر ممکن تعاون فراہم کیا جائے گا۔
دوسری جانب وزیر داخلہ محسن رضا نقوی نے وزیراعظم سے ملاقات میں ملک میں سیکیورٹی انتظامات، افغان باشندوں کی واپسی کے عمل اور متعلقہ وزارت کے امور پر بریفنگ دی۔
وزیراعظم نے بالخصوص عید الفطر کے موقع پر ملک میں امن و امان کی صورتحال پر اطمینان کا اظہار کیا اور سیکیورٹی اداروں کی کارکردگی کو سراہا۔
