کراچی:مودی سرکار نے بھارت میں پاکستان پیپلز پارٹی کے چیئرمین اور سابق وزیر خارجہ بلاول بھٹو کا ایکس اکاؤنٹ بلاک کردیا۔
رپورٹ کے مطابق پیپلزپارٹی کی سینیئر رہنما سینیٹر شیری رحمٰن نے بلاول بھٹو کے ایکس اکاؤنٹ کی بندش کی شدید مذمت کی اور کہا بھارت نے پہلگام واقعے کا الزام تو پاکستان پر دھر دیا، مگر سچائی سامنےآنے پر مودی سرکار اب سخت گھبراہٹ کا شکار ہے۔
انہوں نے کہا کہ پہلگام واقعے کے بعد بھارتی اقدامات پاکستانی موقف کو تقویت دے رہےہیں، مودی سرکار سن لو، آوازیں دبانے سے سچ چھپتا نہیں۔
ان کے علاوہ بلاول ہاوَس کے ترجمان سریندر ولاسائی نے بھارت کی جانب سے چیئرمین بلاول بھٹو زرداری ایکس اکاوَنٹ کو بلاک کرنے پر ردعمل دیتے ہوئے کہا کہ ثابت ہوا کہ چیئرمین بلاول بھٹو زرداری سے مودی ڈرتا ہے، ثابت ہوا کہ بھارت غیرجمہوری ملک اور مودی انتہائی بزدل شخص ہے۔
ان کا کہنا تھا کہ چیئرمین بلاول بھٹو زرداری کے پہلگام معاملے پر بیانیے نے مودی کا ہاضمہ خراب کردیا، بھارت کا بلاول بھٹو زرداری کا ایکس اکاوَنٹ معطل کرنا شتر مرغ کا ریت میں سر دبانے کے مترادف ہے۔
ترجمان بلاول نے کہا کہ یہ بلاول بھٹو زرداری ہی تھے جنہوں نے گجرات کے قصائی کو پہلی بار دنیا کے سامنے بے نقاب کیا،چیئرمین بلاول بھٹو زرداری، جنگی جنون میں مبتلا مودی کو آئینہ دکھاتے رہیں گے۔
