اسلام آباد:سینیٹ نے ہر سال 25 مئی کو پاکستان افریقہ فرینڈشپ ڈے کے طور پر منانے سے متعلق متفقہ قراداد منظور کی ہے، چئیرمین سینیٹ کا کہنا ہے کہ پاکستان افریقی ملکوں کے ساتھ تمام شعبوں میں کثیر الجہتی،پائیدار تزویراتی تعلقات کا فروغ چاہتا ہے۔
سینیٹ اجلاس میں پاکستان افریقہ فرینڈشپ ڈے کے حوالے سے قراداد نائب وزیراعظم اسحاق ڈار نے ایوان میں پیش کرتے ہوئے اسے ایک تاریخی موقع قرار دیا
ایوان نے قراداد کی متفقہ منظوری دی۔ اس موقع پر چئیرمین سینیٹ نے کہا کہ پاکستان اور افریقی ممالک کے عوام مضبوطی دوستی کے ذریعے خوشحال مستقبل کا حصول ممکن بنا سکتے ہیں۔
پاکستان میں تعنیات افریقی ممالک کے سفارتکاروں نے مہمانوں کی گیلری میں بیٹھ کر سینیٹ اجلاس کی کارروائی دیکھی، اپوزیشن کے سینیٹر علی ظفر نے بھی معزز مہمانوں کا خیر مقدم کرتے کہا کہ افریقی ممالک کے دوستی بڑھانے کے لئے پاکستان کی حکومت اور اپوزیشن متفق ہیں۔
اس سے پہلے پاکستان میں تعنیات مختلف افریقی ملکوں کے سفارتکاروں نے چئیرمین سینیٹ سے پارلیمنٹ ہاوس میں ملاقات بھی کی۔ملاقات میں مختلف سیاسی جماعتوں کے قائدین بھی موجود تھے ۔اس موقع پر چیئرمین سینیٹ نے کہا کہ پاکستان اور افریقی ممالک میں تجارت، سرمایہ کاری، عوامی اور پارلیمانی رابطوں کے فروغ کے وسیع مواقع موجود ہیں۔
بعد ازاں چئیرمین سینیٹ نے افریقی سفارتکاروں کے اعزاز میں پارلیمنٹ ہاوس میں دئیے گئے استقبالیہ سے خطاب میں کہا کہ پاکستان اور افریقہ درپش چیلنجز کو مواقع میں بدلنے کے لئے پرعزم ہیں۔
اسقبالیہ میں ارکان سینیٹ نے بھی کثیر تعداد میں شرکت کی جو اس بات کا مظہر تھا کہ پاکستان اور افریقہ کے درمیان ہر سطح پر رابطوں کو فروغ مل رہا ہے۔
