اسلام آباد:نائب وزیراعظم و وزیر خارجہ سینیٹر اسحاق ڈار سے آئی ایم ایف کے مشرق وسطی اور وسط ایشیا کے ڈائریکٹر جہاد آزور نے ملاقات کی ہے۔اسحاق ڈار نے ایکسٹنڈڈ فنڈ سہولت کے مطابق پہلے جائزے کی تکمیل پر اطمینان کا اظہار کیا۔
ترجمان دفترخارجہ کے مطابق اسلام آباد میں ہونے والی ملاقات میں معاون خصوصی طارق باجوہ، سیکرٹری خزانہ اار ایف بی آر کے حکام بھی شریک تھے۔ نائب وزیراعظم اور وزیر خارجہ اسحاق ڈار نے ایکسٹنڈڈ فنڈ سہولت کے مطابق پہلے جائزے کی تکمیل پر اطمینان کا اظہار کیا۔
سینیٹر محمد اسحاق ڈار نے پاکستا ن کے ساتھ آئی ایم ایف کے مسلسل تعاون پر شکریہ بھی ادا کیا۔ انہوں نے کہاکہ پاکستان اصلاحات کے ذریعے پائیدار میکرواکنامک استحکام کیلیے پرعزم ہے۔ آئی ایم ایف کے وفد نے پاکستان کی جانب سے جاری اصلاحات کو سراہتے ہوئے ملک کی معاشی ترقی کے حوالے سے مکمل تعاون کا یقین دلایا۔
