پنجاب بھرمیں 12جون تک ہیٹ ویو اور گرمی کی لہر برقرار رہے گی،ترجمان پی ڈی ایم اے

لاہور:پی ڈی ایم اے نے پنجاب بھر میں 12جون تک درجہ حرارت معمول سے 4سے 7ڈگری تک زیادہ رہنے کی پیشگوئی کردی ہے۔ ترجمان پی ڈی ایم اے کے مطابق ساؤتھ پنجاب کے اضلاع بہاولپور ،رحیم یار خان ،ڈیرہ غازی خان اور ملتان میں ہیٹ ویو کی لہر شدید ہو سکتی ہے ۔
انہوں نے کہاکہ آج سرگودھا میں سب سے زیادہ درجہ حرارت 47ڈگری سینٹی گریڈ، لاہور ،ملتان اور فیصل آباد سمیت میدانی علاقوں میں تقریبا ً45ڈگری تک درجہ حرارت ریکارڈ کیا گیا جبکہ ٹوبہ ٹیک سنگھ ،ساہیوال ،اوکاڑہ، منڈی بہاؤالدین ،خانیوال، قصور، لیہ، جھنگ اور حافظ آباد میں 40سے 42ڈگری تک ریکارڈ کیا گیا ۔
ڈی جی عرفان علی کاٹھیا نے کہاکہ وزیر اعلیٰ پنجاب کی ہدایات کے پیش نظر متعلقہ ادارے الرٹ رہیں۔ انہوں نے کہاکہ چولستان کے اضلاع میں صاف پانی کی فراہمی کو یقینی بنایا جا رہا ہے اور تمام ہسپتالوں میں ہیٹ ویو کاؤنٹرز قائم ہیں ، پی ڈی ایم اے پنجاب نے ہیٹ سٹروک سے بچاؤ کیلئے متعلقہ ادویات کی فراہمی یقینی بنانے کی ہدایت کردی ہے۔
انہوں نے کہا کہ میڈیا کے ذریعے شہریوں کو ہیٹ ویو کے خطرات سے آگاہ کیا جا رہا ہے۔ڈی جی پی ڈی ایم اے نے عوام الناس سے التماس کی ہے کہ احتیاطی تدابیر اختیار کریں ۔ انہوں نے کہا کہ بچوں ، بزرگوں اور بیمار افراد کا خاص خیال رکھیں ۔گرمی کی لہر کے اثرات معمر افراد ، بچوں اور بیماروں پر زیادہ ہو سکتے ہیں ،غیر ضروری گھر سے باہر نہ نکلیں ، ہلکے رنگ کا سوتی لباس پہنیں ، ایمرجنسی صورتحال میں پی ڈی ایم اے ہیلپ لائن 1129 پر کال کریں ۔