امریکی صدر ڈونلڈ ٹرمپ کا اے آئی سمٹ سے خطاب، چین کے ساتھ تجارتی معاہدہ جلد متوقع

واشنگٹن: امریکہ کے صدر ڈونلڈ ٹرمپ نے اے آئی سمٹ سے خطاب کرتے ہوئے کہا کہ چین کے ساتھ تجارتی معاہدہ جلد متوقع ہے اور یہ امریکہ کی اقتصادی حکمت عملی کا حصہ ہوگا۔
امریکی صدر نے جاپان کے ساتھ کیے گئے معاہدے کا ذکر کرتے ہوئے کہا کہ جاپان نے 15 فیصد ٹیرف پر اتفاق کیا ہے اور یورپی یونین کے ساتھ بھی تجارتی ٹیرف میں کمی کے لیے سنجیدہ مذاکرات ہو رہے ہیں۔ انہوں نے یہ بھی کہا کہ اگر یورپی بلاک نے امریکہ میں صنعتکاری کے لیے آمادگی ظاہر کی تو ٹیرف میں بڑی کمی کی جائے گی۔
امریکی صدر نے مزید کہا کہ مختلف ممالک پر 15 سے 50 فیصد کے درمیان ٹیرف عائد کیا جائے گا، جس کا مقصد امریکی معیشت کو تقویت دینا اور تجارتی تعلقات میں توازن پیدا کرنا ہے۔
ٹرمپ نے اس خطاب میں توانائی کے شعبے کی اہمیت پر بھی زور دیا، اور کہا کہ امریکہ ایشیا کے ممالک کے ساتھ توانائی کے معاہدے کرنے جا رہا ہے۔ ان کا مقصد تیل کی قیمتوں کو مزید نیچے لانا ہے تاکہ عالمی سطح پر اقتصادی استحکام حاصل کیا جا سکے۔
اس موقع پر امریکی صدر نے مصنوعی ذہانت (AI) کے شعبے میں امریکہ کی قیادت کا بھی ذکر کیا اور کہا کہ امریکہ نے اس دوڑ کی شروعات کی ہے اور وہی اس میں کامیاب ہوگا