اسلام آباد :راول ڈیم میں پانی کی سطح 1750 فٹ تک پہنچ گئی ہے جس کے بعد ڈیم حکام نے اضافی پانی کے اخراج کے لیے اسپل وے کھول دیے ہیں۔ حکام کے مطابق اسپل وے چار سے پانچ گھنٹے تک کھلے رہیں گے اور اس دوران ڈیم سے تقریباً دو فٹ پانی کا اخراج یقینی بنایا جائے گا۔
ڈیم میں پانی ذخیرہ کرنے کی زیادہ سے زیادہ گنجائش 1752 فٹ ہے، جو اب تقریباً مکمل ہو چکی ہے۔ اس صورتحال کے پیش نظر، ملحقہ علاقوں میں رہائش پذیر عوام کو احتیاطی تدابیر اختیار کرنے کی ہدایت کی جارہی ہے۔
حکام نے کہا کہ ڈیم سے ملحقہ علاقوں میں غیر ضروری آمدورفت سے اجتناب کیا جائے اور کسی بھی ہنگامی صورتحال کی صورت میں فوری طور پر مقامی انتظامیہ، ریسکیو 1122 یا دیگر متعلقہ اداروں سے رابطہ کیا جائے۔
