گلگت:گلگت بلتستان میں شاہراہ بابوسر پر سیلابی تباہ کاریوں کے بعد سرچ اور ریسکیو آپریشن جاری ہے وزیر اعلی کے ترجمان فیض اللہ فراق کاکہناہے کہ تھک بھاشہ کے مقام پر سرچ آپریشن کے دوران سیلابی ملبہ میں انسانی جسم کے کچھ اعضا ملے ہیں۔ جنکی شناخت کیلئے ڈی این اے کی ضرورت ہے۔
وزیر اعلی کے ترجمان فیض اللہ فراق نے تفصیلات بتاتے ہوئے کہاکہ سیلاب کی وجہ سے نیاٹ ویلی میں 8 چھوٹے چھوٹے گاؤں شدید متاثر ہوئے ہیں امدادی کارروائی کو تیز کرنے کیلیے ڈپٹی کمشنر کو نیاٹ ویلی روانہ کر دیا گیا ہے متاثرہ علاقوں میں پانی و بجلی کی فراہمی کو یقینی بنانے کیلئے اقدامات اٹھائے جا رہے ہیں ۔
انہوں نے بتایا کہ گانچھے ، استور ، گلگت، غذر اور دیگر علاقوں میں بھی امدادی کارروائیاں جاری ہیں۔ان کا کہنا تھا کہ صوبے میں سیلاب سے بہت بڑی تباہی ہوئی ہے ،بحالی میں وقت لگے گا ۔
