اسلام آباد:آج 5 اگست ہے، وہ دن جب بھارت نے مقبوضہ جموں و کشمیر کی خصوصی آئینی حیثیت ختم کر کے کشمیریوں پر ایک اور ظلم ڈھایا۔ اسی دن کی یاد میں پاکستان، مقبوضہ کشمیر اور دنیا بھر میں یومِ استحصال کشمیر منایا جا رہا ہے تاکہ کشمیری عوام کے حقِ آزادی کی حمایت کی جائے اور بھارتی مظالم کے خلاف عالمی ضمیر کو جگایا جا سکے۔
5 اگست 2019 کو بھارت نے آئین کے آرٹیکل 370 اور 35A کو ختم کر کے کشمیر کی خصوصی حیثیت منسوخ کر دی۔ یہ آئینی شقیں واضح کرتی تھیں کہ مقبوضہ جموں و کشمیر ایک متنازع علاقہ ہے اور اس کا اپنا الگ تشخص و قانون ہے۔ بھارت کے اس یکطرفہ اور غیر آئینی اقدام نے کشمیریوں کو ان کے حقوق سے محروم کیا اور ان کی سرزمین پر جبراً ریاستی اجارہ داری قائم کرنے کی کوشش کی گئی۔
اس فیصلے کے فوراً بعد بھارت نے ہزاروں کشمیریوں کو گرفتار کیا، سیاسی قیادت کو نظربند کر دیا، انٹرنیٹ اور مواصلاتی خدمات کو ڈیڑھ سال تک بند رکھا اور کشمیریوں کو بنیادی انسانی سہولیات سے محروم کر دیا۔ بھارتی حکومت کا مقصد کشمیریوں کی آواز کو دبانا اور دنیا سے ان کے زخم چھپانا تھا، مگر اس ظلم کے باوجود آزادی کی تحریک نہ صرف زندہ رہی بلکہ اس میں مزید شدت آئی۔
یومِ استحصال کے موقع پر پاکستان بھر میں ریلیاں، کانفرنسز اور تقاریب کا انعقاد کیا جا رہا ہے جبکہ دنیا کے مختلف شہروں میں اوورسیز پاکستانی اور کشمیری اس ظلم کے خلاف سراپا احتجاج ہیں۔ انسانی حقوق کی عالمی تنظیمیں بھی بھارت پر کڑی تنقید کرتی ہیں۔ یہ دن عالمی برادری کو یاد دلاتا ہے کہ کشمیری آج بھی آزادی کی جدوجہد کر رہے ہیں اور بھارت کے مظالم اب چھپائے نہیں جا سکتے۔
یومِ استحصال بھارتی مظالم کی مذمت اور کشمیری عوام کے ساتھ اظہارِ یکجہتی کا دن ہے۔ بھارت نے جو زخم دیے وہ آج بھی تازہ ہیں، مگر کشمیریوں کا حوصلہ، عزم اور قربانی کا جذبہ وقت کے ساتھ مزید مضبوط ہوا ہے۔ دنیا کو یہ تسلیم کرنا ہو گا کہ مسئلہ کشمیر صرف سیاسی تنازعہ نہیں بلکہ ایک انسانی المیہ ہے جس کا حل صرف حقِ خودارادیت ہے، جس کا وعدہ اقوامِ متحدہ نے بھی کیا تھا۔
