اسلام آباد:پاکستان نےگلوبل صمود فلوٹیلا کو روکنے کی اسرائیلی کارروائی کی شدید مذمت کی ہے ۔ترجمان دفترخارجہ کاکہناہے کہ فلوٹیلا میں موجود پاکستانی شہریوں کی جان و مال کی حفاظت حکومتِ پاکستان کے لیے اولین ترجیح ہے ۔
ترجمان دفتر خارجہ کے مطابق گلوبل صمود فلوٹیلا کو اسرائیل کی جانب سے روکنا اسے عالمی قوانین کی سنگین خلاف ورزی قرار دیا ہے۔ ترجمان نے کہا کہ یہ فلوٹیلا عالمی یکجہتی اور اخلاقی عزم کی علامت کے طور پر انسانی ہمدردی کا مشن تھا پاکستان نے 16 ستمبر 2025 کو دیگر 15 ممالک کے ساتھ مل کر فلوٹیلا کی سلامتی پر گہری تشویش کا اظہار کرتے ہوئے مشترکہ بیان جاری کیا تھا۔
ترجمان نے مزید کہا کہ فلوٹیلا میں موجود پاکستانی شہریوں کی جان و مال کی حفاظت حکومتِ پاکستان کے لیے اولین ترجیح ہے پاکستان اسرائیل کو تسلیم نہیں کرتا اور اس سلسلے میں خطے کے بین الاقوامی شراکت داروں کے ساتھ قریبی رابطے میں ہے تاکہ پاکستانی شہریوں کی فوری رہائی اور ان کی حفاظت کو یقینی بنایا جا سکے۔
ترجمان دفترخارجہ نے مزید کہا کہ پاکستان اپنے شہریوں کی حفاظت اور جلد وطن واپسی کے لیے اتحادی ممالک کے ساتھ مسلسل رابطے میں ہے اور اس عزم کا اعادہ کرتا ہے کہ ہر ممکن اقدام اٹھایا جائے گا۔
