راولپنڈی:سیکورٹی فورسز نے بھارتی پراکسی، فتنہ الخوارج سے تعلق رکھنے والے خوارج کی موجودگی کی اطلاع پر ضلع کرم کے علاقے ڈوگر میں انٹیلی جنس پر مبنی آپریشن کیا۔ کارروائی کے دوران سیکورٹی فورسز کی مؤثر کارروائی سے سات بھارتی حمایت یافتہ خوارج ہلاک ہوگئے۔
آئی ایس پی آر کے مطابق شدید فائرنگ کے تبادلے کے دوران کیپٹن نعمان سلیم جو بہادر میڈیکل آفیسر تھے اور طبی خدمات کے ساتھ ساتھ بہادری سے لڑتے ہوئے جام شہادت نوش کرگئے ۔ ان کے ساتھ پانچ اہلکار بھی شہید ہوئے جن میں حوالدار امجد علی،نائیک وقاص احمد ،سپاہی اعجاز علی ،سپاہی محمد ولید اور سپاہی محمد شہباز شامل ہیں۔
آئی ایس پی آر کاکہناہے کہ سیکورٹی فورسز کی جانب سے علاقے میں پائے جانے والے کسی بھی خارجی کو ختم کرنے کے لیے سینی ٹائزیشن آپریشن کیا جا رہا ہے ۔ سکیورٹی فورسز اور قانون نافذ کرنے والے ادارے غیرملکی پشت پناہی اور تعاون سے ہونے والی دہشت گردی کے ناسور کو جڑ سے اکھاڑ پھینکنے کے لیے بھرپور شدت کے ساتھ آپریشن جاری رکھیں گے۔
