سمندری طوفان:جنوب مشرقی ایشیائی ممالک میں سمندری طوفان، شدید بارشوں، سیلاب اور لینڈ سلائیڈنگ نے تباہی مچا دی ہے اور قدرتی آفات سے ہلاک ہونے والوں کی تعداد 11 ہزار 150 تک پہنچ گئی ہے۔ غیر ملکی میڈیا کے مطابق انڈونیشیا، سری لنکا، تھائی لینڈ اور ملائیشیا میں سمندری طوفان دتوا کے باعث لاکھوں افراد متاثر ہوئے ہیں جبکہ ہزاروں لوگ بے گھر ہو گئے ہیں۔ انڈونیشیا میں 604، سری لنکا میں 366، تھائی لینڈ میں 176 اور ملائیشیا میں 3 افراد جان کی بازی ہار چکے ہیں۔
میڈیا رپورٹس کے مطابق سری لنکا میں تباہ کاریوں کے باعث ایمرجنسی نافذ کر دی گئی ہے۔ صدر انورا کمارا نے سمندری طوفان، بارشوں اور سیلاب کو بڑے پیمانے پر تباہ کن قرار دیتے ہوئے کہا کہ اس آفت سے ہونے والا نقصان 2004 کے سونامی کے نقصانات سے بھی زیادہ تباہ کن ہے۔
سمندری طوفان دتوا کے زیرِ اثر بھارتی ریاست تامل ناڈو میں بھی شدید بارشیں جاری ہیں، جبکہ بارشوں کے باعث چنائی میں فلائٹ آپریشن معطل کر دیا گیا ہے۔ عالمی فلاحی تنظیم سیو دی چلڈرن کے مطابق انڈونیشیا اور تھائی لینڈ میں شدید سیلاب اور لینڈ سلائیڈنگ سے ہزاروں بچے سکول نہیں جا پا رہے جبکہ انڈونیشیا میں ایک ہزار کے قریب اسکول سیلاب سے تباہ یا بند ہو چکے ہیں۔ متعدد اسکولوں کو عارضی طور پر ایمرجنسی شیلٹرز کے طور پر استعمال کیا جا رہا ہے جس سے تدریسی سرگرمیاں متاثر ہو رہی ہیں۔
