اسلام آباد:صدر آصف علی زرداری نے ظفرالحق حجازی سے وفاقی ٹیکس محتسب کے عہدے کا حلف لے لیا۔
ایوان صدر اسلام آباد میں صدر آصف علی زرداری نے ظفرالحق حجازی سے وفاقی ٹیکس محتسب کے عہدے کا حلف لیا۔
ظفرالحق حجازی چارٹرڈ اکاؤنٹنٹ اور انسٹیٹیوٹ آف چارٹرڈ اکاؤنٹنٹس آف پاکستان کے فیلو ممبر ہیں۔ انہیں ٹیکسیشن، کارپوریٹ اور کیپٹل مارکیٹ ریگولیشن، آڈٹ اوور سائٹ، مالیاتی نظم و نسق اور مشاورتی خدمات کے شعبوں میں چار دہائیوں سے زائد کا وسیع تجربہ حاصل ہے۔ وہ اس سے قبل سیکیورٹیز اینڈ ایکسچینج کمیشن آف پاکستان کے چیئرمین اور آڈٹ اینڈ اوور سائٹ بورڈ آف پاکستان کے چیئرمین کے طور پر بھی خدمات انجام دے چکے ہیں۔
حلف برداری کے بعد وفاقی ٹیکس محتسب ظفرالحق حجازی نےصدر آصف علی زرداری سے ملاقات کی۔ صدرِ مملکت نے ٹیکس دہندگان کی سہولت کے لیے وفاقی ٹیکس محتسب کے کردار سے متعلق عوامی آگاہی بڑھانے کی اہمیت پر زور دیا۔
صدرِ مملکت نے محتسب کو شکایات کے بروقت ازالے کے لیے جدید ٹیکنالوجی کے مؤثر استعمال کی ہدایت کی۔انھوں نے کہاکہ وفاقی ٹیکس محتسب کا دفتر متاثرہ شہریوں کو فوری اور بلا معاوضہ ریلیف فراہم کرے اور ملک بھر میں اپنی رسائی کو مزید وسعت دیتا رہے۔
