اسلام آباد:وفاقی وزیرداخلہ محسن نقوی نے یوم شہادت پر شہید محترمہ بے نظیر بھٹو کی شاندار خدمات کو زبردست الفاظ میں خراج عقیدت پیش کیا ہے۔ وزیر داخلہ محسن نقوی نے کہا کہ شہید بے نظیر بھٹو ایک عہد کا نام ہے جو زندہ رہے گا۔شہید بے نظیر بھٹو کی پاکستان کے لئے قومی اور سیاسی خدمات کو ہمیشہ یاد رکھا جائے گا۔شہید بے نظیر بھٹو کی شخصیت امید، استقامت اور جمہوریت کے اصولوں سے غیرمتزلزل وابستگی کا مجسمہ تھی۔
اپنے ایک بیان میں وزیرداخلہ محسن نقوی نے کہا کہ شہید بے نظیر بھٹو عوام کی طاقت پر کامل یقین رکھتی تھیں۔شہید بے نظیر بھٹو نے پرامن، ترقی پسند اور جمہوری پاکستان کے لئے اپنی جان نچھاور کی۔شہید بے نظیر بھٹو کا وژن تمام جمہوری قوتوں کے لیے مشعلِ راہ ہے۔ شہید بے نظیر بھٹو مزدور، کسان اور پسماندہ طبقات کو قومی ترقی کی بنیاد سمجھتی تھیں۔
انہوں نے کہا کہ بے نظیر بھٹو کا خواب ایسا پاکستان تھا جہاں ہر فرد کی عزت و تکریم کو یقینی بنایا جائے اور جمہوریت کو مضبوط کیا جائے۔ آج صدر آصف علی زرداری اور چیئرمین پیپلز پارٹی بلاول بھٹو زرداری شہید بی بی کی میراث کو آگے بڑھا رہے ہیں۔
وزیرداخلہ محسن نقوی نے کہا کہ شہید بے نظیر بھٹو کا نظریہ آج بھی زندہ ہے اور یہ کل بھی زندہ رہے گا۔
