اسلام آباد:چیئرمین پاکستان علماء کونسل حافظ طاہرمحمود اشرفی نے کہاہے کہ ہم سب نے ملکر انتہاپسندی اور دہشتگردی سمیت فتنہ الہندوستان اور فتنہ الخوارج کا مقابلہ کرنا ہے۔ علماء کرام ملک میں مذہبی ہم آہنگی کےفروغ میں اہم کرداراداکررہےہیں۔
اسلام آباد میں نیوز کانفرنس کر تے ہوئے حافظ طاہرمحمود اشرفی نے کہا کہ وزیراعظم شہباز شریف کی ہدایت پر قائم قومی پیغام امن کمیٹی میں علماء اور مشائخ سمیت اقلیتی برادری کو بھی شامل کیا گیا ہے ۔ ہم سب نے مل کر پاکستا ن کو امن کا گہوارہ بنانا ہے۔ انہوں نے کہاکہ معرکہ حق میں ہماری پاک افواج نے دشمن کو منہ توڑ جواب دے کر دنیا بھر میں ملک کا نام روشن کیا ۔ آج پوری دنیا پاکستان کی دفاعی صلاحیت کی متعرف ہے ۔
انہوں نے کہاکہ ہم نے فتنہ خوارج کے ساتھ فتنہ الہندوستان کا بھی بھرپور مقابلہ کرکے اپنے ملک کو مضبوط اور مستحکم بنانا ہے ۔ افغان حکومت اپنی زمین دہشتگردی کیلئے استعمال ہونے سے روکے۔انہوں نے کہاکہ وزیراعظم کی ہدایت ہےکہ دنیا بھر میں مقیم پاکستانیوں کو باہم سہولیات فراہم کی جائیں۔اس حوالے سےہمارے سفارتخارنے اورقونصل جنرل مستعدی سے کام کررہےہیں۔ انہوں نے کہاکہ بیرون ملک مقیم پاکستانیز اپنے آپ کو منفی سرگرمیوں اور جرائم سے بچائیں۔
احافظ طاہرمحمود اشرفی نے کہاکہ مسئلہ فلسطین میں اپنے دیرینہ مؤقف ایک انچ بھی پیچھے نہیں ہٹے۔ وزیر اعظم شہباز شریف اور فیلڈ مارشل عاصم منیر نے عالمی سطح پر بھرپور انداز میں فلسطین کی ترجمانی کی ۔ انہوں نے کہاکہ پاکستان اپنے فلسطینی بھائیوں کے ساتھ کھڑا ہے ۔
