اسلام آباد:صدر مملکت آصف علی زرداری نے کہا ہے کہ آج پاکستان کی باوقار قوم اور ہماری دلیر مسلح افواج وطن کی سالمیت اور سرحدوں کے تحفظ کے لیے سیسہ پلائی دیوار کی طرح کھڑی ہیں۔
اپنے پیغام میں صدر مملکت نے کہا کہ امن، استحکام اور علاقائی سالمیت پر ریاستِ پاکستان کسی قسم کا سمجھوتہ نہیں کرے گی۔کسی کو یہ غلط فہمی نہیں ہونی چاہیے کہ پاکستان دباؤ یا دھمکی سے مرعوب ہوگا۔ صدر مملکت نے کہا کہ ہماری مسلح افواج کی جوابی صلاحیت ہمہ گیر، بروقت اور فیصلہ کن ہے، اور وہ دشمن کے ناپاک عزائم کو جڑ سے اکھاڑ پھینکنے کی بھرپور استعداد رکھتی ہیں۔ہم تصادم نہیں چاہتے، لیکن اگر کسی نے پاکستان کے امن کو کمزوری سمجھا تو اسے سخت جواب ملے گا۔
صدرِ مملکت کا کہنا تھا کہ پچھلے پانچ سال سے احسان فراموش طالبان رجیم اپنے محسن پاکستان کےخلاف ٹی ٹی پی دہشتگردوں کے ذریعے پاکستان کے طول و عرض میں دہشتگردی کی کارروائیوں میں مصروف ہے۔انہوں نے کہا کہ آج اس مجرم اور بزدل ٹولے نے بین الا قوامی سرحد عبور کر کے پاکستان کی سالمیت کو للکارا ہے۔ صدر مملکت نے کہا کہ پاکستان نے ذمہ دار ریاست کے طور پر سفارتی ذرائع اختیار کیے اور برادر ممالک کی معاونت سے اس مجرم گروہ کو راہِ اعتدال پر لانے کی سنجیدہ کوشش کی، مگر کوئی مثبت پیش رفت نہ ہو سکی۔
صدرِ مملکت نے کہا کہ میں نے آٹھ فروری کو اسلام آباد کی مسجد میں ہونے والے خودکش حملے کے بعد طالبان رجیم کو واضح اور سخت الفاظ میں متنبہ کیا تھا، اور پانچ روز قبل بائیس فروری کو بھی اسی ٹولے کو دوبارہ دوٹوک پیغام دیا تھا۔صدرآصف علی زرداری نے کہا کہ پاکستان کو بخوبی علم ہے کہ تشدد کے منصوبہ ساز، سہولت کار اور سرپرست کہاں بیٹھے ہیں۔ اگر خونریزی کا سلسلہ جاری رہا تو ذمہ دار عناصر ہماری رسائی سے باہر نہیں ہوں گے۔
سماجی رابطے کی ویب سائٹ پر بھی اپنے پیغام میں صدرِ آصف علی زرداری نے کہا کہ پاکستان اپنے امن اور علاقائی سالمیت پر کوئی سمجھوتہ نہیں کرے گا۔صدر مملکت کا کہنا تھا کہ پاکستان کی مسلح افواج کا ردِعمل جامع اور فیصلہ کن ہے۔ انہوں نے خبردار کیا کہ جو عناصر پاکستان کے امن کو کمزوری سمجھتے ہیں، انہیں سخت اور بھرپور جواب کا سامنا کرنا پڑے گا۔
صدرِ مملکت نے اس عزم کا اعادہ کیا کہ ملک کے امن، سلامتی اور سرحدی سالمیت کے تحفظ کے لیے پوری قوم متحد ہے اور ہر قسم کے خطرات کا مؤثر انداز میں مقابلہ کیا جائےگا۔
