اسلام آباد:نیشنل ڈیزاسٹر مینجمنٹ اتھارٹی نے ملک کے بالائی اور بعض مغربی علاقوں میں خراب موسمی صورتحال کے پیش نظر ہنگامی الرٹ جاری کر دیا ہے۔
این ڈی ایم اے کے مطابق اگلے دو سے تین روز کے دوران شمالی علاقہ جات، خیبرپختونخوا، آزاد کشمیر اور گلگت بلتستان میں تیز ہواؤں کے ساتھ بارش اور برفباری کا امکان ہےجس کے باعث لینڈ سلائیڈنگ اور سیلابی صورتحال پیدا ہو سکتی ہے۔ نیشنل ایمرجنسیز آپریشن سینٹر کے مطابق قراقرم ہائی وے سمیت مختلف اہم شاہراہیں متاثر ہو سکتی ہیں ۔ چترال، سوات، مانسہرہ، مظفرآباد اور وادی نیلم میں بھی سڑکوں کی بندش کا خدشہ ہے۔
بلوچستان کے متعدد اضلاع میں بھی لینڈ سلائیڈنگ کا الرٹ جاری کیا گیا ہے۔ جہاں قومی شاہراہوں پر آمدورفت متاثر ہونے کا امکان ہے۔بلوچستان کے اضلاع زیارت، ہرنائی، سبی، موسیٰ خیل، شیرانی اور لورالائی میں بھی لینڈ سلائیڈنگ کا الرٹ جاری کیا گیا ہے۔ اتھارٹی نے خبردار کیا ہے کہ قومی شاہراہ N-50، N-65 اور N-70 پر آمدورفت متاثر ہو سکتی ہے، لہٰذا مسافر اور مقامی انتظامیہ چوکس رہیں۔
گلگت بلتستان میں گلیشیائی جھیلوں کے پھٹنے کا خطرہ ظاہر کیا گیا ہےجس سے اچانک سیلاب آ سکتا ہے۔این ڈی ایم اے نے عوام سے غیر ضروری سفر سے گریز اور احتیاطی تدابیر اختیار کرنے کی اپیل کی ہے۔
