لاہور: پاکستان کرکٹ بورڈ (پی سی بی) نے کراچی میں 28 اپریل کو ہونے والے کوالیفائر میچ کے لیے ٹکٹوں کی فروخت اور ادائیگی کے طریقہ کار سے متعلق تفصیلات جاری کر دی ہیں۔
اعلامیے کے مطابق شائقین پی سی بی کی آفیشل ویب سائٹ کے ذریعے ای ٹکٹس خرید سکتے ہیں، جہاں آن لائن ادائیگی کی سہولت بھی دستیاب ہے۔ ای ٹکٹ رکھنے والے افراد اسٹیڈیم میں داخلے کے لیے اپنے موبائل فون پر ٹکٹ اسکین کروا سکتے ہیں یا پرنٹ شدہ کاپی بھی ساتھ لا سکتے ہیں۔
پی سی بی کے مطابق نیشنل اسٹیڈیم کراچی کے تمام انکلوژرز کی ٹکٹ کی قیمت 500 روپے مقرر کی گئی ہے۔ اس کے علاوہ کراچی میں فزیکل ٹکٹس نیشنل اسٹیڈیم کے بالمقابل چائنا گراؤنڈ میں قائم نجی کوریئر آفس سے بھی حاصل کی جا سکتی ہیں۔
اعلامیے میں مزید بتایا گیا ہے کہ کوالیفائر میچ کے لیے ای ٹکٹس کی فروخت آج رات سے شروع ہوگی، جبکہ لاہور میں 29 اپریل اور یکم مئی کو ہونے والے ایلیمنیٹرز کی ٹکٹوں کی تفصیلات بعد میں جاری کی جائیں گی۔
