اسلام آباد: پمز اسپتال انتظامیہ نے بانی پاکستان تحریک انصاف کے آنکھوں کے علاج سے متعلق پریس ریلیز جاری کر دی ہے۔
اسپتال کے مطابق مریض کو 28 اپریل کو فالو اپ علاج کے لیے پمز لایا گیا، جہاں انہیں اینٹی وی ای جی ایف انٹرا ویٹریل انجیکشن کی چوتھی ڈوز دی گئی۔ انتظامیہ کا کہنا ہے کہ طبی عمل سے قبل مریض کی باقاعدہ رضامندی حاصل کی گئی۔
پریس ریلیز کے مطابق ماہرینِ چشم نے مکمل معائنہ کیا اور مریض کو طبی طور پر مستحکم قرار دیا۔ آپٹیکل کوہیرنس ٹوموگرافی (OCT) کے نتائج میں بہتری دیکھی گئی۔
اسپتال انتظامیہ نے مزید بتایا کہ یہ طریقہ کار ڈے کیئر سرجری کے طور پر مکمل کیا گیا، جس کے دوران اور بعد میں مریض کی حالت مستحکم رہی۔ علاج کے بعد مریض کو ضروری ہدایات اور فالو اپ پلان کے ساتھ ڈسچارج کر دیا گیا۔
